مرحبا كيفكم؟؟ إن شاء الله بخير 🤍✨
سو ، حابة اليوم أحكي عن التوجيهي وكيف كانت حياتي معه...
أول شي طبعا احنا عنا التوجيهي = فلم رعب ، حرفياً هيك كنا بنعرف من قبل 5 سنين اللي بيوصل التوجيهي معناها بده يعاااني كتير ، الدنيا كلها كانت عاملة تهويل لهاي الفترة لدرجة الواحد صار يخاف يوصللها..
أول ما بلشت السنة صراحة كنت كتير متساهلة مو هامني شي ، ما كنت أدرس أول بأول وكنت دايما مهملة الوضع ، كنت مغترة بحالي نوعاً ما لأني كنت فاهمة ف خلص ما كنت احل أسئلة رياضيات مثلا ، أو أطبق على قوانين الكيمياء والفيزياء ، ولا حتى كنت أحفظ التواريخ بالتاريخ ، الفصل الأول كان عبارة عن مراكمة بشكلللل..
صراحة أنا بنت كنت طول عمري علاماتي بال 90 ومعدلي دايما 92 وفوق ف يعني هاد كان سبب لغروري إنه ينمو 🙂 يعني قلت عادي كله سهل وما في شي صعب إن شاء الله
بحيااتي ما كنت مهملة لهالدرجة بالنسبة للدراسة ، بس ما بعرف شو صارلي بهاي السنة ، انتحست ما بعرف شو اللي صارلي انحسدت ولا شو؟؟ حرفياً غصب عني كان الموضوع كنت أمل بسرعة واتعب لدرجة بفترة من الفترات تعبت وصرت احس بدوخة...
المهم خلص الفصل الأول على هاد المنوال ، كنت البطاقات أحضر حصة أو حصتين كل أسبوع ولما يجي عبالي أحل شوية رياضيات ، بالعطلة اللي بعد أول فصل كان لازم أختم المواد عشان أدرس الفصل الثاني ، وطلعت من حظي ، العطلة كانت شهر ونص تقريبا خلصت حصص كل المواد وختمت ختمة وحدة لكل مادة إلا ال English بعترف ختمته شلفقة وما تعبت حالي فيه..
اجى الفصل الثاني وصرت أحسن من الفصل الأول ، أقل ما فيها كنت حصص الرياضيات احضرهم أول بأول وما راكمت فيه كتير ، الكيمياء كان أسهل وحتى الرياضيات كان أسهل من الفصل الأول الأحياء مادته كانت حلوة المهم الأمور كانت ماشية أحسن بشكل عام من البداية ، وصلنا لنص الفصل الثاني ، صراحة زهقت مليت قرفت كل شي صار بس بدي أخلص بطلت أركز مع المعلمات خص نص الفيزياء ، كنت ما بحب الفيزياء هيك بحسها مادة بتكتم على نفسي ، بعد فترة ختمنا المواد بالمدرسة وعطلنا عشان ندرس للنهائي اجت امتحانات المدرسة وخلصت وبلشناااا...
الشهر اللي قبل الوزاري ، هاي الفترة كانت صعبة نوعاً ما كان لازم أختم كل المواد الفصلين ولو ختمتهم كلهم أحاول أختم كمان مرة عشان يرسخوا المعلومات أكتر ، ختمت مرة ويخلف علي 🙂
نعمل سكيب عن دراستي لأنه نسيتها كلها 🙂........
.......
وصلنا للامتحانات، أول امتحان كان دين ، الحمدلله كان سهل كان عندي خطئين صراحة كان شي برفع المعنويات ، بعده عربي كان سهل لمتوسط كان عندي 3 أخطاء ، رياضيات ورقة أولى... هون كان الخازوق ، اجت صعبة والمادة أساساً بتخزين وبتسد النفس ، حاولت احل قد ما بقدر بس تركت بجوز سؤالين حل كتابي ، حكيت معطياتهم وما لحقت أكمل ، طبعا هاي الورقة جبت فيها 149 انصدمت ما توقعت هالقد اجيب لأنه حكوا في بالامتحان أخطاء ورح يزيدوا علامات بس ما أظن زادوني...
الرياضيات الورقة الثانية... فكرت إنه الأولى صعبة بس للأسف اجت هاي أصعب ، مستوى الامتحان كان أصعب من الاولى مع إنه دايماً بجيبوها أسهل بس الحمدلله جبت فيها 167 حسب ما أتذكر ، بعديها اجى الفيزياء ، بصراحة ما كنت أحبه ف كان بدي احذفه وقلت شو ما اجيب خلص مو مشكلة ما أنا إن شاء الله نيتي افلل بالكيمياء لأني بحبها ، وخلص الفيزياء حبيت شو ما كان المهم ما اخبص فيه كتير ، وفعلا جبت فيه 160 ، اجى ال English صراحة أنا بحب والمادة كتير لذلك كنت أحل وأنا مبسوطة ، طلع عندي خطئين غير التعبير ما علينا مش هون الشي المهم ، اجى بعده الكيمياء ، هاي المادة اللي بحبها وبموت فيها وإن شاء الله قلت رح افلل ، اجى الامتحان نااااار حرفياً الأساتذة قيموا الامتحان صعب جداً حتى للأستاذ ، واتسمى الامتحان انتقام من الطلاب ، وفوق هاد كان في أسئلة خطأ وما الها حل وأشياء الها أكتر من حل ، كان الامتحان عبارة عن جحيم ، وصارت نيتي من 200 ل يا رب أنجح المهم جبت فيه 136 الحمدلله وانحذف وما انحسب من المعدل ، اللي وراه كان أحياء كان سهل بس يو نو لما يكون عقلك مسكر وما بدي تشغل مخك وتفكر؟؟ لا وفوق هاد كنت أغير أشياء من الصح للخطأ 🙂💔 المهم ضل آخر امتحان اللي هو التاريخ ، ومن الفرحة كنا من واحنا بيوم امتحان الأحياء مكيفين وياااي مو ضايل غير 48 ساعة ونخلص من هاد الكابوس ، ما بدي أحكي عن الامتحان بس صراحة من الحماس خبصت و والله في شي قارئته ومركزة عليه وعدته لاني حسيت إنه رح يجي واجى وكمان غلطت جاوبت صح وبعدين غيرت جوابي ، لازم هيك يصير والله انقهرت عليها أكتر شي
بس الحمدلله بالرغم من إني ما تعبت كتير الله أكرمني بمعدل حلو كتير وصراحة لو كان هاد الشي مقترن بوقت دراستي ما كنت بجيب هيك معدل ، الحمدلله جبت 83,8 وأنا مبسوطة كتير من هاد المعدل ، بكفي إني ابسطت أهلي والناس اللي بحبهم ويحبوني 🤍🤍✨
أهم شي حطمت فكرة إنه لازم كل طالب توجيهي يصحى من الفجر يدرس لأنه الأيام اللي صحيت فيها عالفجر عشان أدرس كانت معدودة عالأصابع 🙂💔
اوك بحبكم 🤍✨
باي